الوساوس والشك في العبادة والخير

_الوساوس💜_

_ايه دا انا صليت العصر اربع ركعات ولا تلاتة؟!

_هو انا غسلت رجلي وانا بتوضى ولا لأ؟!

_انا سجدت سجدة واحدة ولا سجدتين؟!

_انا حاسة ان صلاتي مش مقبولة!!

_هي ايه الأفكار الوحشة اللي بتجيلي دي؟!

صلي على النبي كدة بقى وتعالي نحل الموضوع دا مع بعض💜

كل اللي بيحصل لك دا عبارة عن حاجة واحدة بس وهي *_وساوس من الشيطان_*

وساوس يعني بيخليكي دايما موسوسة وقلقانة من ناحية أي حاجة بتعمليها..سواء فى الدين أو حتى لما بتعملي خير مثلا فى حياتك العادية

تيجي مثلا تتوضي وتبقي متوضية فعلا صح وتلاقي نفسك خايفة "هو انا نسيت حاجة ولا لأ؟!"..

ونفس النظام على الصلاة والصيام وكل حاجة فى دينك

وتيجي مثلا تعملي خير لوجه الله..تلاقي نفسك بتقولي انا كدة منافقة وبعمل كدة علشان منظري قدام الناس..مع ان أصلا نيتك من البداية كويسة جدا ونفسك تاخدي حسنات..لكن الشيطان يسيبك فى حالك؟!

 مستحييييل

فالحل علشان الشيطان يزهق منك ويبعد عنك انك تطنشي الوساوس دي خالص وتحصني نفسك بذكر الله

*_بالنسبة للصلاة🌸_*

الشيطان مش سايبك فى حالك وكل شوية يخليكي تسرحي أو تفكري نفسك ناسية حاجة وهكذا

لما يحصل لك كدة وانتي بتصلي هتنفثي على شمالك 3 مرات "وعشان تفهمي اكتر هتنفثي دي يعني هتتفي بس طبعا مش هتخرجي مياة من الفم بقى وهكذا..لا هو مجرد هوا بسيط كدة بس..يعني لا منها بتنفخي ولا منها بتخرجي مياة من فمك" وتستعيذي بالله من الشيطان الرچيم 3 مرات

_ايه دا هو ينفع اعمل كدة وانا بصلي؟!

أيوة ينفع لو الشيطان بيوسوسلك كتير أثناء الصلاة

ودي وصية الرسول صلى الله عليه وسلم لما اشتكى إليه عثمان بن أبي العاص الثقفي رضي الله عنه قائلاً يا رسول الله: إن الشيطان قد لبّس علي صلاتي فقال صلى الله عليه وسلم: ((ذلك شيطان يقال له خنزب، فإذا أحسست بذلك فانفث عن يسارك ثلاث مرات وتعوذ بالله من الشيطان ثلاثاً)) قال عثمان: (ففعلت ذلك فأذهب الله عني ما أجد)

يعني الحمدلله عثمان بن أبي العاص لما عمل بكلام الرسول صلى الله عليه وسلم..الشيطان بعد عنه ومبقاش يجيله أثناء الصلاة

وبالنسبة لسجدة السهو فالرأي الأرجح والأصح بين العلماء ان الانسان الموسوس مش هيسجد سجدة سهو لما يكون عنده شك فى صلاته..

لان كدة للأسف انتي ممكن تخلي الشيطان يفضل يوسوسلك لدرجة انك خلاص هتسجدي السجدة دي فى كل صلاة..

وللأسف بنات كتير سابت الصلاة بسبب الوساوس..

فاوعي تسيبي صلاتك لأي سبب

والأحسن انك تعملي بكلام الرسول صلى الله عليه وسلم اللي مكتوب فوق..

وتسجدي بس سجدة السهو دي لما تكوني متأكدة فعلا انك نسيتي حاجة فى صلاتك

*_بالنسبة للوضوء🌸_*

انتي اتوضيتي اهو وكله تمام وخلصتي وضوء ولقيتي نفسك خايفة احسن تكوني نسيتي حاجة..فانتي هتكملي طريقك وتروحي تصلي واوعي تتوضي تاني

لانك كدة هتبقي بتسمحي للشيطان انه يعقدك فعلا فى حياتك

_*بالنسبة للأفكار🌸*_

انتي قاعدة كدة مع نفسك وعمالة تجيلك أفكار غريبة جدا زي مثلا أستغفر الله "هو مين اللي خلق ربنا".."طب هو ليه ربنا هيدَّخل ناس معينة النار"..

وحاجات كتير من دي..

فانتي على طول هتلحقي نفسك وتنفثي برضو على شمالك 3 مرات وتقولي آمنت بالله ورسله وتستعيذي بالله من الشيطان الرچيم 👇🏻💜

فالمؤمن أرشده النبي ﷺ إذا رأى مثل هذا أن يقول: آمنت بالله ورسله، أعوذ بالله من الشيطان الرچيم هكذا أمر الصحابة قال لهم: إذا وجدتم ذلك فليقل أحدكم: آمنت بالله ورسله، وليتعوذ بالله ولينته، 

هذا هو الدواء لهذه الوساوس الخبيثة إذا رآها المؤمن

واقرأي كدة الكلام دا ضروري👇🏻💜

فالنبي ﷺ لما قيل له، قال له بعض الصحابة: يا رسول الله! إن أحدنا ليجد ما لأن يخر من السماء أحب إليه من أن ينطق به 

بعض الصحابة جت تشتكي للرسول صلى الله عليه وسلم ان بيجيلهم وساوس خطيرة جدا وان عندهم انهم يسقطوا من السماء أهون بكتير انهم ينطقوا بالوساوس اللي بتجيلهم دي..

يعني تخيلي ان حتى الصحابة كان بيجيلهم وساوس من الشيطان بالنسبة لربنا ودينهم وهكذا ومكانوش بيقدروا أبدا ينطقوها لانهم الحمدلله مؤمنين جدا بالله بس الشيطان لما زهق منهم من كتر ايمانهم..فبقى بيحاول يوسوسلهم من أي ناحية

فمتخافيش انتي الحمدلله مش وحشة..

انتي بنوتة جميلة بتآمن بالله وبالرسول صلى الله عليه وسلم وبتعمل اللي اتأمرت به

فافضلي محصنة نفسك بس زي ما قولتلك وهتلاقي الشيطان بيبعد عنك لانه بيختفي أول ما بتذكري الله

ربنا يلعن الشيطان ويبعده عننا جميعا يارب ويجعل قلوبنا مليانة بالإيمان ويجمعنا كلنا فى الفردوس الأعلى يارب🤲🏻💜